De kleierkemissie zörg d'r veur det Vors, Sirremoniemeister en Raod van Elf altied strak in 't pak zitte en good gemuts zien. Ouk druueg dees kemmissie d'r zörg veur det 't trio d'r altied piekfijn op steit. Det wilt zegge 'n net pak, 'n moeëje muts, haemde, hase, strikske en pochetje en neteurlik mantels en scepters. 't Insigste wao dees minse ('t trio) dus zelf veur mótte zörge is óndergood, sök en schoon.

De mantels veur 't trio waere um de paar jaor vervange en de mutse idder jaor. De mutse en pakke van de Raod van Elf gaon gelökkig waat langer mei. Met de mutse perbere weej altied elf jaor te doon. Met de zwarte pakke van de hiere is det gen haolbare kaart. Dees zien beslis ierder aan vervanging toe. Dao wao 't trio gans door ós gezelschap wuurt aangekleid, verwachte weej det de hiere van de Raod zelf 'ne duit in 't zekske doon. Heejveur spare zeej idder jaor 'n bepaold bedraag. Veur die pöpkes kinne zeej dus jaomer genóg gen klepke koupe!

Neteurlik hebbe weej ouk aandach veur ós Tanzmeriekes. Oetintelik vorme zeej 't visitekaertje van ós gezelschap en dene zeej d'r dan ouk oet te zeen um door 'n ringske te haole.

Tiedes 't vastelaovesseizoen zörg de kleierkemmissie d'r altied veur det mantels, mutse en vere op tied op de plaats zien wao ouk ós trio is. Nao 't seizoen is d'r weer tied um alles good nao te kieke. Noeëdzakelikke ripperaties waere verrich, smeis waere dinger vervange en alles wuurt tösse de mótteballe opgeborge in d'n alde kleierkas.

Zoeëas geej dus waal zult begriepe, is de kleierkemmissie bekans ut ganse jaor door aktief. Vastelaovesgezelschap De Kwas meug zich laote zeen!