Nao de vastelaovestied wuurt d'r iers flink aafgekik, maar in de zomer begint de Prinse Zeuk kemissie weer kriebels te veule. Wae mót ut kómmend jaor de ier kriege um ós gezelschap in de vastelaovestied aan te veure?

Meistal hebbe weej begin september nog gen flauw benöl en as weej ós leeje vraoge breefkes met gooje veurstelle in te levere, kieke die ós dök aan wie 'ne boetsauto. Ein gelök hebbe weej dan: de raojliester van det jaor gaeve ós vuuel serieuze (en minder serieuze) name. Dao wuurt dan örtelik euver gebreenstormp, jubilea van vereiniginge waere meigenaome en oetintelik wuurt d'r eine top-3 vasgesteld. Nummer 1 wuurt benaderd as toekómstige Prins, teminste as ut ós lök um met ein smoesje binne te kómme.

De toekómstige Hoeëgheid mak ein lieske met name veur adjudante, die weej veur um gaon polse en die taege ós motte zegge of ze 't wille, zónder de naam van de nieje prins te kinne!  Is det good gegaon dan bringe weej eur örges same (met eur vruiwkes) um de res te bespraeke.

Statiefoto's make en medailies bestelle völle d'n tièd op waeg nao 't oetkómme, dreej waeke veur de vastelaovend. Alles in ut geniep netuurlik!