Aafgeloupe zóndaag tiédes de bizóndere leejevergadering haet d’n hièr Wim Brummans de allerièrste erkintelikheidsónderscheiding met de toepasselikke naam “D’n Brum” óntvange.

Dees ièr as naamgaever aan dees nieje ónderscheiding is Wim gegaeve door ziene jaorelange inzet veur ós gezelschap. Vanaaf de oprichting wies 1991 as veurzitter, later mier op de achtergrónd maar met ein duutelik belangrièke rol as veurzitter van de AZ-kemissie nog steeds belas met vueël zake.

Van 1967 wies 1972 is Wim zelfs nog Vors Kwastius gewaes.

De letste jaore heel hae zich bezig met o.a de vastelaovesmis, de raojlièste, zien eige ald-pepeer route, ut “Wim Brummans Venloos” en de administratie van de medalies.

In 1978 óntving hae reeds de Extra Hoeëge Ónderscheiding van vastelaovesgezelschap “De Kwas” en in 2004 oèt hande van börgemeister Jan Schrijen de gemeintelikke waardaeringsspeld.

De erkintelikheidónderscheiding “D’n Brum” wuurt oètgereik beej hoeëge oètzóndering aan de persoeën in groeët Venlo:
• dae zich mièr as 11 jaor boètegewoeën actief haet opgesteld.
• dae zien eige rol óndergeschik mak aan det van andere.
• dae vorm wet te gaeve aan bestuurlikke functies binne ut gezelschap.
• dae ut verdeend um auk (nog ens) op de veurgrónd te staon.