Aafgeloupe zaoterdaag woort in 'ne bómvolle Kwastetempel 't 59e trio van De Kwas bekind gemak.

't Motto van dit jaor: "Kwaste en Kweskes wiste 't al, Vastelaovend viers se in 't Jaomerdal", kwaam óntzettend good truuk beej de verkleide minse en de aankleiing van de zaal.

Naodet Aparty en DJ Salva de zaal al flink opgewermp hadde, waas 't d'n tied aan Vors Kwastius met zien wieze raod van elf um met 'n grande entree de zaal te betraeje. 't Belangriekste moment van d'n aovend waas ummers aangebraoke.

Van achter oet de zaal woort, onder leiding van Joekskepel Flabbedeius, 't nieje trio, incognito, nao de bühne geleid. Nao 11 hints van Vors Kwastius ginge de maskes aaf en waas 't nieje trio gebaore! Prins Mark d'n twieëde met zien adjudante Wilburt en Jeroen regere vanaaf aafgeloupe zaoterdaag euver 't Kwasteriek.

Mier info euver ós trio vindt geej heej.

Daonao brachte Gólden Hiering, Bjorn & Mieke en 'n verassingsoptraeje van Marco Schell de zaal tot 'n kaokpunt.