Vandaag, 23 jannerwari 2021, zoel met 'n geweldig Pallesaotebal de letste vastelaovend van Vors Kwastius en Börstelke aafgetrap waere. Nog eine kier zoele zeej ós gezelschap dreej waeke lang veurgaon en op eur eige wies reprissentere. 

Helaas is eur det neet gegaeve vanwaege de Corona-crisis. 't Is veur idderein 'n ónwerkelik vastelaovesseizoen maar veur eur in 't bizónder.

Op 10 oktober 2009 nome Hay Aerts en Tom Nabben 't euver van René Thijssen en Wil van der Sande en krege metein met 'n verjónging van de Raod van Elf te make. Zeej bedachte 't Veurschete (taegeswaoordig de Raodsdaag) um op ludieke wies de nieje en alde(re) raodsleje kinnis met mekaar te laote make. 'n Groeet succes en wies op d'n daag van vandaag nog altied 'n sjiek begin vlak veur de start van 't vastelaovesseizoen.

Op 22 november 2009 stónde zeej beej 't aaftraeje van Prins Marcel I met zien adjudante Maurice en Ronny veur 't iers op Kwastebühne um vervolges in 2010 in de persoeëne van Prins Erwin I met zien adjudante Jack en Jack eur ierste trio te prissentere.

In alle jaore zien zeej De Kwas op veurtreffelikke wies veurgegaon en hebbe zeej ós gezelschap op 'ne waerdige wies gereprissenteerd. 

Zelfs wie d'r in 't seizoen 2013-2014 gen trio woort oetgerope maar 'n gans Boeregezelschap, bleve zeej op de achtergrónd drök bezig um alles in goje baan te leije.

Zaoterdaag 23 oktober 2021 zulle Hay Aerts en Tom Nabben, tiedes de Vorste- en Sirremoniemeisterswissel, de vorstescepter en bel euverdrage aan eur opvolgers, Marco Jacobs en Bas Lammen. 
Mier info euver de invölling van dezen daag volg nog.