Vanmorge um klokslaag 11.11 oor hebbe weej de ierste kwastekrant oetgereik aan Ruud Stikkelbroeck en Hay Geritz. Names 't voltallige perseniel van VieCuri nome zeej oet hande van Vors Kwastius en Börstelke deze in óntvangs.

Waat normaal gespraoke plaatsvindt op 'ne joeksigen aovend in Ut Tref waas vanmorge, vanwaege de Corona-maatregele, verplaats nao boete. Op d'n diek tösse Venlo-Zuid en Venlo-Zuid-Zuid goof ózze Vors aan det 't geveul van vastelaovend dit jaor helaas gans anders is.

"Vastelaovend thoes, gen feeste, genne Prins, gen kwante adjudante en genne opmaot nao de dreej dólle daag. Maar gelökkig waal 't geveul van same zien en verbóndenheid. Det is ouk wao 't beej de vastelaovend, in de kern, um dreijt. 

Dit jaor bezörge weej De Kwa(t)s, net wie andere jaore, in 'n oplage van 5000 stöks, thoes beej de luuj in ós wiek. 'ne Krant dae veur d'n eine waat haop guuef, zoeëdet d'r weer zutjes aan gedach kin waere aan 't volgend seizoen en veur d'n ander um waat truues te gaeve beej 't bekieke van al die blieje gezichter, maar baovenal met de baodschap um ouk in dezen tied vastelaovend te blieve belaeve. Ouk al kinne we noow neet oetbundig viere, d’r efkes beej stil staon is al genóg!

Det efkes stil staon doon weej ouk op dit moment, tiedes de oetreiking van ós hoesorgaan De Kwa(t)s. Deze wuurt idder jaor oetgereik aan 'n vereiniging, instelling, bedrief of persoeën met 'ne groeëte, positieve en maatschappelikke inbring in ós samelaeving.
Dit jaor velt deze ier te beurt aan 't perseniel van VieCuri. Ós eige gashoes, wao met man en mach, vanaaf fibberwari van 't vurrig jaor, gewerk wuurt um minse op te vange en te verzörge die besmet zien gerak met 'n zier besmettelik virus, baovenop de reguliere zörg. Hiel waat symbolische acties ginge ós al veur, maar toch vinde weej det ós gashoes in ós eige Venlo-Zuid 't verdeend um in de aandach te blieve staon!"