Bedreuf vernome weej 't haergaon van d'n hier Jan Nabben,
Ald Adjudant, Ald Prins, Ald Lid en
Lid van Verdeenste van Vastelaovesgezelschap De Kwas.

Jan kwaam in 1987 beej De Kwas as adjudant beej Prins Noud I en bleef nao dezen tied lid van ós gezelschap. 

In 1997 móch Jan, same met zien adjudante Bertold en Sander, de Venlo-Zuidse Vastelaovend veurgaon as Prins Jan I.

As aktief TC-lid droog Jan zien steinke beej aan de schoeëne decors passende beej 't thema van det jaor. Ouk beej 't ophange van de hoesversiering beej Prins en Adjudante waas hae van de partie.
Boete zien TC-werk waas Jan zier actief beej De Kwas. 't Organisere van vloeëiemerrete, ophaole van ald papeer, achter de BBQ staon beej de Femiliedaag, niks waas Jan te gek. Vuul gelache woort d'r beej 'd'n eige inbring' tiedes de zittinge en later nog beej 't Galderbal. 

Tiedes de Femiliedaag van 2017 woort Jan, naodet hae aangegaeve had te stoppe as lid, efkes in 't zunke gezatte en beneump tot Lid Van Verdeenste van ós gezelschap. 

Zoeëas geej hebt kinne laeze waas Jan 'ne persoeën met 'n groeët Kwastehert. Det bliek ouk waal oet 't gegaeve um de opbrings van de collectebus beej zien aafscheid beschikbaar te stelle aan ós gezelschap.

Jan, 'ne mins met 't hert op de juuste plaats. As ald lid, ald adjudant, ald Prins en Lid van Verdeenste, maar baovenal as laevespartner van zien vruike Hannie, zaliger, pap van ózze sirremoniemeister Tom en ald tanzmerieke Marjo en grueëtse opa van Teun, Saar en Baer.