Vors Kwastius haet as letste taak ziene sirremoniemeister meuge decorere met de Extra Hoeëge Ónderscheiding van V.G. De Kwas.

Dit gebeurde zaoterdaagmiddaag tiedes de Boetegewoeëne Leje Vergadering in residentie Ut Tref te Venlo-Zuid.

Beej dees vergadering ware alle leje met eur partners aanwezig en waas d’r ‘n bizónder welkóm veur Leje Van Verdeenste en dragers van de Extra Hoeëge Ónderscheiding. Tot dit gezelschap van wieze dames en hiere meug Tom, nao zien actieve rol as sirremoniemeister, toe gaon traeje.

Tom haet dees ónderscheiding verdeend veur zienen inzet beej de Jeug van De Kwas, wao hae beej de opstart van dees jeugaafdeiling, ein van de kertrekkers waas. Vanaaf ‘t begin vervölde hae heej inkele jaore de iervolle taak as veurzitter, um daonao de euverstap te make nao de rol van Börstelke. 

As sirremoniemeister vroog hae veur ruum baan as ós gezelschap d’r aan kwaam. Det deej hae met waord en gebaar, maar ‘t meis herkinbaar met zien bel en sirremoniemeisterstek. Vanoet dees functie haet Tom zich 12 jaor lang, same met (noow ald-Vors Kwastius Hay Aerts), ingezatte um ‘t spel van klatergóld en parelwien, op ’n waerdige wies, vorm te gaeve.

Met dit gruuetse gebaar neme Hay en Tom same aafscheid van eur functie maar nog lang neet van De Kwas.