Pestoeër Theo Pieëters euverleje

Ózze buurman -Ut Tref is ós thoes- dus zoeë meuge we um toch waal neume, is zaoterdaag 25 maart j.l., op 84 jäörige laeftied, euverleje.

 

’ne Goje buurman is baeter as ’n vaere vrind, zoeë wuurt gezag. En ’n goje buurman hebbe we zeker aan um gehad.

’ne Buurman, dae vol actieve belangstelling waas, veur ós, zien bure. ‘ne Buurman dae ouk gaer op bezeuk kwaam tiedes ós activiteite en smeis zelfs 'n rol mei pikde op Kwastebuun.

Maar hae zoog ós ouk gaer beej um op bezeuk kómme. Gruuets zote we dan ouk in vol ornaat met de snót veuraan tiedes de vastelaovesmis in zien/ós kerk.

Ós -vruger stiekeme- gewuuente um grei te lieëne veur ós activiteite – waat kazuivels beveurbeeld veur de sketch beej de ónthölling van ‘t trio- waas beej um gen inkel probleem. As gooj bure brachte we vanzelfspraekend alles ouk weer netjes truuk.

As lid van de Luie Hook waas hae neteurlik ouk boete ós activiteite regelmaotig in Ut Tref te vinde. Hae hoort dus -waat óneerbiedig gezag- zó'n bietje beej d’n hoesraod.

In 1998 vónde we ’t dan ouk gepas um um te iere door um ós Extra Hoeëge Ónderscheiding toe te kinne. Neet allein um waat heejbaove geschreve steit, maar veural ouk vanwaege de wies, wie hae in de kerk en in ós gemeinschap stónd. Aope, met ’n werme belangstelling veur idderein, wars van regelkes en bemeuizuch, maar waal staon veur zien zaak.

Jaomer det zien gezóndheid ’t de letste jaore neet mier toeleet um ónder zien minse te kómme. Via ‘ne aafscheidsbreef noom hae aafscheid van ós allemaol um nao 'n verzörgingshoes in Sevenum te verhoeze.

’n Aafscheid det noow definitief is gewaore.