Ós bereikte 't dreuvige niejs van 't haergaon van ós ald-lid en drager van de Extra Hoeëge Ónderscheiding, Mia Mulders. 

Veur vuuel leje zal de naam Mia Mulders meugelik gen herinneringe oprope. Zeej noom namelik al in 1993 aafscheid van De Kwas.

Det zeej beej det aafscheid geïerd woort met de Extra Hoeëge Ónderscheiding guf aevel aan det zeej in de periode det zeej actief waas bij De Kwas hiel belangriek is gewaes.

Mia eur betrokkenheid begint in seizoen 1982-1983. Mia geit les gaeve aan de Garde. ‘n Garde die neet allein beej De Kwas optrooj, maar beveurbeeld ouk op zittinge beej  Jocus. Beej det les gaeve hoort ouk ’t bedinke van de danse én ’t zörge veur de passende kleier. En det beteikende idder jaor ’n niejen dans, met ouk nieje kleier. In daen tied waas ’t namelik gebroekelik  det ’t prinselik trio oetgerope woort binne ‘n thema/’n verhäölke. En ouk dae dans pasde dan binne det verhäölke.
De leje van de Garde ware op det moment gen lid van De Kwas, maar vormde ’n apart clubke. Mia waas, in ’t begin nog same met Wilma Hendrikx, eur vertaegewoordiging in de Kwastevergadering. En ouk Mia waas wies in 1988 gen lid van De Kwas, terwiel ’t toch zier regelmaotig op de vergaderinge waas. Mia haet oetintelik zelf maar aangegaeve det ’t lid woel waere en dus ouk cóntributie woel gaon betale!
Oet zien opmerkinge op vergaderige kós se dutelik laeze det zeej stónd veur eure groep.

Det Mia gezeen eur hendigheid met naold en draod ouk lid woort van de Kleierkemissie zal  nemes verbaze. Nieje mantels veur ’t Trio? Mia keek waal of ‘t ze nog kós opknappe of makde nieje. Nieje roeëd-blauwe kiele veur de Raod op Vastelaovesdinsdaag? Mia zörgde veur ’t stóf en de petroeëne. En ouk (de kleier van) de dansmarietjes hoorte beej ’t takepakket.

Nao óngevier 10 jaor actief te zien gewaes goof Mia aan det zeej eure tied mier aan andere zake woel gaon bestaeje. Op det moment bleek nog ens extra wie sterk de binding waas met de maedjes van de Garde. ’n Aantal waas al van plan um langzamerhand ens te gaon stoppe, maar de aankóndiging van ’t vertrek waas raeje veur alle leje um ’t danspekske aan de wilge te hange. We hadde vanaaf det moment gen groeëte garde mier, maar allein nog de minigarde.

Mia bleef de jaore daona nog regelmaotig acte de presence gaeve beej activiteite van De Kwas. Maar gaondewaeg woort det steeds minder. De letste tied woeënde Mia vanwaege probleme met eur  geheuge in ’n verzörgingshoes. Inkele maonde geleje óntmoette ik Mia dao. ‘t Kós mich örges van, zei ‘t. “De Kwas,” zei ik en det waas raeje um kort herinneringe op te haole. En met de groete veur Tien en Fried bin ik hoeswaarts gegaon.

Gerard Driessen
archivaris