Aafgeloupe zóndaag 12 jannewari 2025 is d’n hier Twan Toma gedecoreerd met de Extra Hoeëge Ónderscheijing van Vastelaovesgezelschap De Kwas.
Aafgeloupe zóndaag 12 jannewari 2025 is d’n hier Twan Toma gedecoreerd met de Extra Hoeëge Ónderscheijing van Vastelaovesgezelschap De Kwas.
Dit gebeurde tiedes de Grande Première van De Kwastefilm, oetgebrach ter gelaegenheid van ‘t 6x11 jäörig jubileum van ós gezelschap. In ’n oetverkóch Theater De Garage ware leje, iereleje, ald-leje, ald- Prinse en ald-Adjudante aanwezig.
Nao aafloup van ’t vertoeëne van de documentaire woort Twan in de schienwerpers gezatte en kreeg hae inkele vraoge van Vors Kwastius veurgeschótteld. Zien reacties ware as vanalds en met name door zienen fiemel, um alles wies in de kleinste puntjes te regele en details te constatere, haet Twan d’r beej De Kwas veur gezörg, det de leje altied motte streve um veur die 10 te blieve gaon.
Twan kwaam begin jaore ‘80 beej De Kwas. Vanaaf det moment doorleep hae verschillende
kemissies. Met name beej de Technische Kemissie en de Kleierkemissie kwaam zien geveul en gedöld veur ‘t fiemelwerk good van pas. Beej de idejekemissie stónd hae dök in verschillende rolle op Kwastebühne. Ouk noom hae zitting in ’t jubelcomité 3x11 jaor De Kwas en haolde, meide door zien idee, de Black Fööss nao Venlo. In detzelfde jubeljaor ging hae as Prins Twan I met zien adjudante Hay en John de Venlo-Zuidse vastelaovend veur.
Op 8 oktober 1994 volgde Twan, Martin Christis op as Vors Kwastius. Det bleef Twan doon wies april 1998. In 2002 is Twan gestop beej De Kwas.
Met ’t oet d’n aek dreije van de Kwastefilm woort Twan door de jubelkemissie 6x11 jaor De Kwas benaderd of hae d’r veur aope stónd um aan dit filmdocument mei te werke. Vanzelfspraekend zag hae vólmondig jao! Ouk heej waas hae, veural in ’t begin, weer de gedreve Kwastemins van vruueger.
De ier um de Extra Hoeëge Ónderscheijing in óntvangs te meuge neme, kwaam veur Twan volledig ónverwach. Zoeë hebbe weej, as De Kwas, ózze fiemelaer efkes stil gekrege. Maar det dan waal met ’n diek dankewaal!